Entre nós e o mundo

Actividade vinculada á exposición “Territorios en tránsito”

O pasado 30 de outubro tivo lugar unha nova actividade vinculada á exposición Territorios en tránsito: afluencias e influencias. Jesús Madriñán e a colección do Museo Etnolóxico, nesta ocasión o museo saíu fora para que a actividade fora desenvolvida nas instalacións da Fundación Hospital Asilo Nosa Señora dos Anxos, facilitando a accesibilidade dos seus usuarios ós programas do museo.

A proposta, deseñada e desenvolvida por Aida Lojo, converteuse nun espazo de encontro e aprendizaxe compartida, no que as persoas residentes do asilo exploraron, a través dos catálogos da exposición e fotografías dos fondos do Museo Etnolóxico, os conceptos centrais da mostra —a mobilidade humana, a identidade e o vínculo co territorio—.

A partir das imaxes e dos relatos, xurdiron lembranzas, reflexións e emocións que deron lugar a unha conversa íntima e aberta sobre as experiencias de desprazamento, os cambios e as transformacións culturais vividas ao longo do tempo. As voces das persoas participantes axudaron a reconstruír pequenas historias que conectan o local co global, o persoal co colectivo.

A actividade puxo de manifesto o valor da conversa e da memoria compartida como ferramentas para comprendernos na diversidade e seguir construíndo un futuro baseado na empatía e na convivencia.