A importancia do traballo silenciado das lavandeiras, pranchadoras, costureiras e tecedeiras

O Museo Etnolóxico de Ribadavia participou por segundo ano consecutivo no Plan Corresponsables organizado pola Secretaría do Ministerio de Igualdade en colaboración ca Xunta de Galicia e co Concello de Ribadavia co obxectivo iniciar o camiño cara a garantía do coidado como un dereito dende a óptica da igualdade.

Tomando como punto de partida a colección do tecido do Museo, realizáronse talleres onde as nenas e nenos, durante 10 xornadas, puideron aprender sobre traballos como lavado, pranchado e tinguido, pero tamén a coser, tecer, etc. Traballos todos eles, realizados tradicionalmente por mulleres e non sempre valorados. Así mesmo fíxose fincapé na importancia do consumo responsable na conservación do medio ambiente, especialmente a da auga dos ríos. Para finalizar celebrouse un día adicado os xogos tradicionais.