A mirada dos espazos
A mirada dos espazos
A exposioción a Mirada dos Espazos constitúe un paso relevante que o Museo Etnolóxico dá na sua andaina polos terreos da imaxe e a fotografía.
Logo das primeiras series expositivas (Imaxes de Galicia e Álbums para o Reencontro. Ribadavia e os Ribadavienses) e das publicacións editadas sobre o mundo da imaxe, pretendemos agora proxectar unha ollada etnolóxica máis sistemática sobre o espazos visibles da sociedade que a imaxe fotográfica mostra é, ás veces, oculta. Figura como subtítulo da exposición a expresión Camiño dunha antropoloxía visual, porque a través dos distintos autores e dos seus obradoiros realizamos un relato etnográfico no que asoman ámbitos e espazos da vida social, descritos e interpretados aquí como textos que suxiren, insinúan e falan.
É intención do Museo lembrar con esta Mostra a figura de Benito Losada, que motivou a participación dende hai anos do Museo no Outono Fotográfico e fixo posible uha relación frutífera entre a nosa institución e a Casa da Xuventude. Benito Losada foi quen de promover nesta provincia o interese pola fotografía como fenómeno social e cultural, interese que se estendeu ao resto do país complementando outros iniciativas desenvolvidas tempo atrás noutras cidades e vilas galegas. Para o Museo Etnolóxico Benito Losada foi un amigo e un colaborador particularmente sensible ao fondo etnográfico e á dimensión etnoantropolóxica que nós lle outorgamos á fotografía.