8 de Abril do 2020
En moitas localidades de Galicia a popular «Queima do Meco», o mércores de cinsa, pon remate ás festas pagás do Entroido e dando paso á Coresma.
O Meco é un personaxe lendario na literatura popular galega, segundo conta a tradición respondía á figura dun cura ou seminarista, home ruín que abusaba do dereito de pernada e ofendía ás mulleres e como consecuencia dos seus feitíos e ofensas estas tomaron a xustiza pola man e aforcárono na galla dunha figueira. Cando o xuíz abre o sumario por tal axustizamento e pregunta: quen matou ao Meco? todos os homes e mulleres responden ao unísono: Matámolo todos!
A ameaza de «se non calas, lévate o Meco» foi utilizada por moitas nais para que os seus meniños e meniñas calasen se choraban ou facían trasnadas. Incluso os mecos cobran protagonismo nalgunha poesía satírica, en cuxos primeiros versos rezan: «Na nosa vida tal vimos/ cousa máis tola/ unha muller barbuda/ cas pernas tortas».
As veciñas e veciños de Ribadavia este ano quixeron render unha vez máis homenaxe á figura do Meco, invadindo de Mecos e "Mecas" a rúa principal da vila, colgaron dos farois ou amarrados ao mobiliario urbano, foron protagonistas no balcón e nas escaleiras do Concello, incluso unha parella deles, parecía gozar do sol e da bebida sentados a modo de «terraceo» xunto o Castelo.
#aculturasegue #aculturagalegasegue #EuQuedoNaCasa