16 de Abril do 2020
Co nome de Entroido coñécese tamén ao boneco de palla ou similares que despois de ser exhibido remata queimado ou afogado publicamente no Martes do Entroido.
As queimas sufridas polo «entroido», o «meco» ou a «sardiña» puñan fin a un período considerado pecadento e que debía ser purificado polo lume para preparar ao pobo para a Coresma.
A queima desta figura ten certo ritual e suntuosidade ao seren paseados en carros tirados por bois, burros ou carneiros e enfeitados con plantas do monte, e acompañados sempre de grande xentío.
En Viana, Calvos de Randín, Maside, Entrimo, Ribeiro, San Pedro de Moreiras, Cea e en outros lugares da provincia ourensá, constituían os carros do Entroido un espectáculo semellante ao das carrozas das batallas de flores.
No norte portugués os bonecos queimados nestas datas reciben ademais o nome de Entrudos ou de Coresmas, João ou Xudas.
As fotografías, foron realizadas por José Antonio Gómez Vázquez (fundador da Agrupación Fotográfica de Ribadavia e do Grupo 77), no mes de febreiro do ano 1970, no lugar de Barcia, en Quins (Ourense)
*No catálogo de Museos de España CERES, pódense atopar outras fichas de catalogación co tema do Entroido como festividade popular e doutras fotografías que forman parte do fondo documental do Museo.
#aculturasegue #aculturagalegasegue #EuQuedoNaCasa